Декабр 27 рзы Аԥснытәи аҳәынҭқарратә университет аҭоурыхтә факультет аҟны имҩаԥысит аполитикатәи ауаажәларратәи усзуҩ Нестор Аполлон-иԥа Лакоба ибиуст аартра.

«Декабр 27 (1936 ш.) — ҳажәлар рҵеи лаша Нестор Лакоба ашҳам анирҭаз амш ауп, декабр 28 рзы иԥсҭазаарагьы далҵит. Алекциақәа рҟны Лакоба иԥсҭазаареи инысымҩеи заҳауа ҳастудентцәа ргәаҵаҟны ихаҿсахьа наунагӡа иаанхарц азы, аскульптор Иури Чкадуа авторс дызмоу абаҟа ҳфакультет аҟны иааҳартит», — иҳәеит аҭоурыхтә факультет адекан, аҭоурыхтә ҭҵаарадыррақәа ркандидат Алик Габелиа.

Абиуст аартра иазкыз аусмҩаԥгатә аҟны иқәгылаз ауниверситет анапхгареи, аҵарауааи, ауаажәларратә усзуҩцәеи иазгәарҭеит, Нестор Лакоба иреволиуциатә қәԥареи, иполитикатә усуреи, иааидкыланы иугозар, иԥсҭазаара зегьы аԥсуа жәлари Аԥсуа ҳәынҭқарреи ишрызкыз.

Аусмҩаԥгатә иалахәыз Лаврент Лакоба Лакәараа рыхьӡала иҭабуп ҳәа реиҳәеит Нестор Лакоба ибаҟа ақәыргылараҟны аџьабаа збаз зегьы, хаҭала аҵараиурҭа анапхгареи аҭоурыхтә факультет аусзуҩцәеи.

Нестор Лакоба ибиуст ақәыргылара иазкыз аусмҩаԥгатә ашьҭахь аҭоурыхтә факультет аҟны имҩаԥысит иара убасгьы Симон Басариа диижьҭеи 140 шықәса аҵреи Николаи Ақырҭаа диижьҭеи 130 аҵреи ирызкыз астол гежь.

Астол гежь аусура аартуа, Аԥсны аҭоурыхи, археологиеи, аетнологиеи ркафедра аусзуҩ, аҭоурыхтә ҭҵаарадыррақәа ркандидат Џьамбул Инџьгиа иазгәеиҭеит, Нестор Лакобеи, Симон Басариеи, Николаи Ақырҭааи реиԥш иҟоу Аԥсны аҵеицәа хьӡырҳәагақәа ХХ-тәи ашәышықәсазы Аԥсны аҭоурых ауасхыр азышьҭазҵаз ишреиуоу, урҭ рыԥсадгьыл аҿаҧхьа рџьабаа шшьардоу.

Аԥсны аҭоурыхи, археологиеи, аетнологиеи ркафедра арҵаҩы, аҭоурыхтә ҭҵаарадыррақәа ркандидат Илона Агрба лықәгылараҟны инарҭбааны дазааҭгылеит Симон Басариа иҭоурыхтә хаҿсахьа. Аҭоурыхтә ҭҵаарадыррақәа рдоктор Сослан Салаҟаиа дахцәажәеит Николаи Ақырҭаа иполитикатәи иуаажәларратәи усзура.